सांगोला माझा (जवळा-प्रतिनिधी):
जवळे ता.सांगोला येथील सर्वपरिचित आणि अत्यंत आदरणीय व्यक्तिमत्त्व कै. श्रीमती कमल सदाशिव सुतार यांचे दि. ०६ जुलै २०२५ रोजी वयाच्या 76 व्या वर्षी अल्पशा आजाराने निधन झाले. त्यांच्या निधनाने सुतार कुटुंबावर दुःखाचा डोंगर कोसळला असून, परिसरातील अनेक कुटुंबांनी आपली आईसमान व्यक्ती गमावली आहे.
कै. कमलताईंचे संपूर्ण आयुष्य म्हणजे संयम, साधेपणा, श्रद्धा आणि मातृत्व यांचा साक्षात अवतार होता. त्यांनी आपले आयुष्य कुटुंबासाठी समर्पित केले. घरातील प्रत्येक सदस्याच्या सुखदुःखात त्यांनी आईसारखी साथ दिली. अत्यंत साधी राहणी, मनमिळावूपणा आणि शेजाऱ्यापाजाऱ्यांशी जिव्हाळ्याचे संबंध हीच त्यांची खरी ओळख होती.
त्यांच्या स्मितहास्याने अनेकांचे मन जिंकले. कित्येक घरांमध्ये त्यांनी संकटकाळात धीर दिला, मार्गदर्शन केले. त्यांच्या अंगी असलेले धैर्य, सहनशीलता आणि प्रेमळ स्वभाव हेच त्यांचे खरे दागिने होते.
त्या श्री. चंद्रकांत (बंडू) सदाशिव व ग्रा.पं. सदस्य श्री.धनेश सदाशिव सुतार यांच्या मातोश्री होत. संपूर्ण सुतार कुटुंब त्या काळात बांधून ठेवणारे एक मजबूत आधारस्तंभ होत्या. मुला–नातवंडांना संस्कारांची शिदोरी देताना त्यांनी आयुष्यभर कोणतीही तक्रार केली नाही, फक्त दिलेच – प्रेम, आधार, आणि मायेची सावली.त्यांच्या पश्चात त्यांची मुले,मुली,नातवंडे असा मोठा परिवार आहे.
ज्या दिवशी लाखो भाविक विठोबाच्या दर्शनासाठी पंढरपूरला रवाना होत होते, त्या आषाढी एकादशीच्या पवित्र दिवशीच त्यांनी देहत्याग केला. हरिनामाच्या गजरात त्या अनंतात विलीन झाल्या. हे विलक्षण योगायोग मन हेलावून टाकणारे ठरले.
“जग सोडले तरी माणूस आपल्यात असतो – आठवणीत, सवयींत, संस्कारांत, आणि ममत्वाच्या प्रत्येक आठवणीत…”
कै. कमलताईंच्या जाण्याने एक संपूर्ण पिढीला जीवनमूल्यांची शिकवण देणारे व्यक्तिमत्त्व हरपले आहे.
त्यांच्या निधनानंतर परिसरात शोककळा पसरली असून, विविध स्तरांतील ग्रामस्थ, नातेवाईक, हितचिंतक यांनी सुतार कुटुंबीयांचे सांत्वन केले. त्यांना श्रद्धांजली अर्पण करताना अनेकांनी अश्रूंना वाट मोकळी करून दिली.
रक्षा विसर्जन, पिंडदान व फुले टाकणे हा कार्यक्रम मंगळवार, दि. ०८ जुलै २०२५ रोजी सकाळी 7.30 वाजता पार पडणार आहे.
त्यांच्या जाण्यानं संपूर्ण सुतार कुटुंब शोकाकुल असून, सर्वांच्या सहवेदना त्यांच्यासोबत आहेत.
भावपूर्ण श्रद्धांजली!
️ ईश्वर त्यांच्या आत्म्यास शांती देवो! ️
संपादक
प्रा.कैलास गोरे
